Yadda ma’aikacin banki ya riƙa naɗar bidiyon tsiraicin abokan aikinsa mata a Najeriya.
Rundunar ƴansanda a jihar Legas da ke Najeriya ta ce za ta gurfanar da tsophon ma’aikacin bankin Access wanda ake zargi da ɗaukar hotunan tsiraicin abokan aikinsa mata.
Wannan na zuwa ne bayan wata sanarwa da bankin ya fitar a ranar Litinin inda ya bayyana cewa ya miƙa batun zargin ɗaya daga cikin ma’aikatansu a ɓangaren hulɗa da abokan cinikayya, na ɗaukar hotunan tsiraici ga hukumomi.
Sanarwar da suka wallafa a shafin sada zumunta ta ce bankin zai bai wa hukumomi haɗin kai, kuma bankin zai ci gaba da kare mutuncin ma’aikatansa.
Bayani da ya fita a makon da ya gabata ya nuna cewa wani ma’aikacin bankin Access ya naɗi bidiyoyin abokan aikinsa mata a cikin ban-ɗaki ba tare da saninsu ba.