Rahotanni daga jihar Jigawa sun nuna cewa wani malami mai suna Sani, mazaunin unguwar Yalwawa da ke Dutse, ya janye daga shirin aurar da ‘yarsa ga wani saurayi bayan ya gano cewa saurayin na nuna goyon baya ga shugaban ƙasa Bola Ahmed Tinubu a kafafen sada zumunta.
Majiyoyi sun bayyana cewa an shirya ɗaura auren ne a yau, amma a daren jiya ne mahaifin yarinyar ya sanar da iyayen saurayin da waliyyansa cewa ya fasa ci gaba da shirin auren, lamarin da ya jefa bangarorin biyu cikin ruɗani.
Bayan da magabata da wasu dattawa suka shiga tsakani domin sasanta rikicin, Malam Sani ya shaida musu cewa saurayin bai taɓa yi masa wani laifi kai tsaye ba, sai dai kawai batun yadda yake tallata manufofin Tinubu a shafukan sada zumunta, wanda ya bayyana a matsayin abin da bai gamsar da shi ba.
Ya ce yadda saurayin ke bayyana ra’ayinsa a kan harkokin siyasa, musamman goyon bayan shugaban ƙasa, yana nuna masa rashin tausayi da kuma abin da ya kira ƙarancin imani, dalilin da ya sa ya ga bai dace ya aurar da ‘yarsa gare shi ba.
Rahotanni sun ce wannan mataki ya zo ne a daidai lokacin da ake gab da kammala dukkan shirye-shiryen bikin auren, lamarin da ya janyo ce-ce-ku-ce a tsakanin al’umma, inda wasu ke ganin hakan ya shafi ra’ayin siyasa fiye da cancantar saurayin, yayin da wasu ke goyon bayan matakin mahaifin bisa dalilan da ya bayar.
Har yanzu dai babu wata sanarwa daga bangaren saurayin ko iyalansa dangane da wannan lamari, amma masu sharhi na ganin irin wannan al’amari na iya ƙara haskaka yadda siyasa ke shiga cikin al’amuran yau da kullum na zamantakewa a wasu sassan Najeriya.
Me za ku ce?