DAGA Shafin Dokin Karfe TV
Jarumar Tik-Tok Hafsat Waziri, wadda aka fi sani da Babiana ta bayyana cewa mijinta ya sake ta saki uku dan haka, yanzu haka ba ta da aure kuma ta ga cewa bai kamata ta yi ta ɓoye-ɓoyen sakin da mijinta yayi mata ba gara ta fito ta shaidawa Duniya halin da take ciki.
Jaridar Dokin Ƙarfe TV ta samu takardar shaidar sakin wadda Babiana Waziri ta aiko mata inda a ciki aka bayyana cewa “Ni Muhammad Izzudden Eze na saki matata saki uku”. An rubuta takardar ranar 11 ga watan 4 na shekarar 2024, kamar yadda kuke gani.
Babiana ta kuma bayyana cewa “Na shiga bala’in rayuwa a dalilin aurensa da nayi, har asibitin mahaukata an kai ni a dalilin aure kuma har yanzu ban gama farfaɗowa ba”. In ji ta.
Daga nan ta ƙara da cewa “Mijina ba ya biya mun buƙatuna na rayuwa ya bar ni, ni nake yi wa kaina komai. Ba daidai ba ne ka auri mata ba ka da kuɗin ciyar da ita da biya mata buƙatunta ba”. In ji ta.
Ta kuma ta ƙara da cewa “Na godewa Allah da jarrabawa ta ta zo a aure. Ni na yi aure don in raya Sunnar ma’aiki amma abin ya zame mun masifa da bala’i”. A cewarta.