Lauyoyin Jihar Zamfara Sun Goyi Bayan Gayyatar Gwamna Dauda A Gaban Majalisa Kan Ŕikicin Majalisar Ďokoki.
Kungiyar lauyoyin Jihar Zamfara ta bayyana goyon bayanta ga matakin da Majalisar Wakilai ta Nijeriya ta dauka na gayyatar Gwamnan jihar Zamfara, Dauda Lawal, da shugabannin majalisar dokokin jihar domin su bayyana kan rikicin da ke kara tsananta a majalisar dokokin jihar da kuma tabarbarewar tsaro a fadin jihar da ke arewa maso yammacin Nijeriya.
Wannan kungiya, wadda ke da matsayi a fannin kare doka da tsarin mulki, ta bayyana kiran a matsayin matakin da kundin tsarin mulki ya amince da shi, bisa tanade-tanaden sashe na 88 da 89 na Kundin Tsarin Mulki na 1999, wanda ya ba Majalisar Tarayya damar gudanar da bincike kan batutuwan da suka shafi jama’a da kuma kiran jami’ai masu ruwa da tsaki.
Barrista Aisha Muhammed, shugabar kungiyar, ta bayyana a wata sanarwa da ta fitar a ranar Lahadi cewa matakin da majalisar ta dauka “yana da ingancin doka, yana da tushe a tsarin mulki, kuma yana da matukar muhimmanci” wajen kare mulkin dimokuradiyya da tabbatar da bin doka da oda.
Ta bayyana cewa Gwamna Dauda Lawal da shugabannin majalisar jihar dole ne su amsa tambayoyi game da dakatar da wasu ‘yan majalisa bakwai da kuma bayyana kujerar wani dan majalisa a matsayin ta babu kowa samanta abubuwan da ta ce sun haifar da “matsaloli masu tsanani na tsarin mulki” tare da yiwuwar karya ka’idar dimokradiyya.
“Gwamnoni da shugabannin majalisa ba za su yi amfani da kariya daga shari’a a matsayin garkuwa daga binciken da ya dace ba,” in ji Muhammed, tana nuni da Sashe na 308 na Kundin Tsarin Mulki, wanda ke ba da kariya daga bin kadin shari’a, amma bai hana kiran majalisa ba idan ba tilas ba ne.
“Tushen dimokradiyya shi ne kasawa a faifai. Babu wani mai rike da mukamin gwamnati, ko da matsayinsa ya yi girma, da ya fi ikon jama’a wajen sanin gaskiya da gaskiya.”
Kwamitin Majalisar Wakilai kan koke-koke ya fitar da sammaci a ranar Juma’a, yana umartar Gwamna Lawal da takwaransa na Benue, Hyacinth Alia, da shugabannin majalisunsu da su bayyana a gabansa a ranar 8 ga Mayu.
Wannan mataki ya biyo bayan wata kara daga kungiyar kare dimokradiyya da bin doka, wadda ta bayyana tabarbarewar tsaro da kuma gazawar majalisu a jihohin biyu.
Jihar Zamfara na fama da matsalolin ‘yan bindiga, inda hare-hare na baya-bayan nan suka yi sanadin mutuwar daruruwan mutane, ciki ha da jami’an tsaron al’umma guda shida da ‘yan sa kai guda hudu a Karamar Hukumar Anka a ranar 22 ga Maris, da kuma ma’aikatan hakar zinariya guda 20 a Karamar Hukumar Maru a ranar 24 ga Afrilu.
Rikicin majalisar jihar, wanda ya kunshi rabuwar kai da zargin katsalandan daga bangaren gwamnatin jiha, ya kara jefa jihar cikin kalubale wajen gudanar da mulki.
Muhammed ta soki yadda Gwamna Lawal ke nuna amincewa da wadannan matakan da majalisar ta dauka, tana kiran a duba su ta fuskar doka da na ladabtarwa.
Ta jaddada cewa shigar Majalisar Tarayya cikin lamarin ba wai kawai ya dace ba ne, illa ma wajibi ne domin kare tsarin mulki da kuma amsa koke-koken jama’a.
“Tambayar ita ce ba ko za a iya kiran Gwamna ko Kakakin majalisa ba, tambayar ita ce me za su ce? Me za su amsa?” in ji ta.